Bosca Forbartha Eolais (KDB)
Is réimeas maoine intleachtúla é KDB atá comhlíontach leis an Eagraíocht um Chomhar agus Forbairt Eacnamaíochta (OECD) a sholáthraíonn faoiseamh Cánach Corparáide ar ioncam ó shócmhainní cáilitheacha.
Ón 1 Deireadh Fómhair 2023, féadfaidh cuideachta a cháilíonn don réimeas KDB a bheith i dteideal asbhaint atá cothrom le 20% dá brabúis incháilithe. Ciallaíonn sé seo go bhféadtar cáin ar ráta éifeachtach 10% a ghearradh ar na brabúis incháilithe.
Suas go dtí an 30 Meán Fómhair 2023, féadfaidh cuideachta a cháilíonn don réimeas a bheith i dteideal asbhaint atá cothrom le 50% dá brabúis incháilithe. Ciallaíonn sé seo go bhféadtar cáin ar ráta éifeachtach 6.25% a ghearradh ar na brabúis incháilithe.
Tá síneadh ama curtha leis an bhfaoiseamh KDB chun tréimhsí cuntasaíochta a thosaíonn roimh an 1 Eanáir 2027 a chur san áireamh.
Cén chaoi a gcáilíonn cuideachta don KDB?
Chun cáiliú:
- ní mór go dtosódh tréimhse chuntasaíochta na cuideachta ar 1 Eanáir 2016, nó dá éis
- ní mór go dtuillfeadh an chuideachta ioncam ó shócmhainn cháilitheach inúsáidte
- agus
- ní mór gur chruthaigh an chuideachta an tsócmhainn cháilitheach inúsáidte ó ghníomhaíochtaí cáilitheacha Taighde agus Forbartha (T&F).
Céard is sócmhainn cháilitheach ann?
Is éard is sócmhainn cháilitheach ann ná sócmhainn a chruthaítear ó ghníomhaíochtaí cáilitheacha T&F, amhail:
- clár ríomhaireachta
- aireagán faoi chosaint ag paitinn cháilitheach
- nó
- Maoin Intleachtúil (IP) do chuideachtaí beaga arna deimhniú ag an gCeannasaí Paitinní mar IP inphaitinnithe, ach gan a bheith paitinnithe.
Cén chaoi le cur isteach ar an KDB
Ba chóir do chuideachta Seirbhís ar Líne na gCoimisinéirí Ioncaim (ROS) a úsáid chun iarratas a dhéanamh ar fhaoiseamh KDB ar a dtuairisceán Cánach Corparáide.
Féach na nótaí treorach Guidance Notes on the Knowledge Development Box le haghaidh tuilleadh eolais faoin KDB.