Nuashonrú eile ar an Scéim Stórasaithe Fiachais
Inné (09/05/2024), dheimhnigh na Coimisinéirí Ioncaim go raibh beagnach 90% den fhiachas €1.65 billiún a bhí sa stóras ag tús mhí Aibreáin 2024 íoctha ina iomláine anois, urraithe faoi shocraíochtaí tráthíocaíochtaí nó curtha san áireamh mar chuid de shocraíocht tráthíocaíochtaí beartaithe atá á thabhairt chun críche. Dá bhrí sin, tá an t-iarmhéid €200 milliún atá fós laistigh den stóras laghdaithe go mór ó bhuaic de €3.2 billiún in Eanáir 2022.
Aithníonn na Coimisinéirí Ioncaim an leibhéal ard rannpháirtíochta atá léirithe ag gnóthaí agus a ngníomhairí le linn thréimhse na Scéime Stórasaithe Fiachais agus, go háirithe, roimh an spriocdháta 1 Bealtaine 2024, agus leanfar ar aghaidh ag obair le gnóthaí chun iarratais ar phleananna íocaíochta atá idir lámha a thabhairt chun críche.
Tá éilimh eisithe anois ag na Coimisinéirí Ioncaim ar na gnóthaí sin a bhfuil dliteanais amuigh acu laistigh den stóras fiachais. Eisíodh thart ar 11,700 éileamh ar ghnóthaí a bhfuil fiachas stórasaithe os cionn €500 acu. Tá dliteanas amuigh níos lú ná €5,000 ag os cionn 60% (7,279) de na gnóthaí sin agus tá dliteanais amuigh idir €5,000 agus €50,000 ag 30% eile acu (3,670). Tá dliteanas amuigh os cionn €50,000 ag an 10% eile de ghnólachtaí (775), arb ionann é agus €130 milliún.
Tugtar achoimre sna fógraí éilimh ar an gcáin/na cáin atá dlite ag an ngnó, agus iarrtar ar an ngnó dul i dteagmháil leis na Coimisinéirí Ioncaim chun plean íocaíochta a shocrú laistigh de sheacht lá. Tugtar achoimre ann freisin ar na hiarmhairtí a bhaineann le neamhrannpháirtíocht laistigh den tréimhse ama a shonraítear, lena n-áireofar éileamh deiridh a eisiúint ag deireadh na tréimhse seacht lá, agus ansin gan mhoill agus go huathoibríoch, go mbeadh an fiachas stórasaithe faoi réir imeachtaí forfheidhmithe caighdeánacha. Ciallaíonn sé seo nach mbeidh an ráta úis 0% agus na roghanna íocaíochta solúbtha atá i bhfeidhm maidir le fiachas stórasaithe ar fáil a thuilleadh.
Tá na Coimisinéirí Ioncaim an-tiomanta do thacaíocht a thabhairt do ghnóthaí inmharthana, agus mar a bhí i gcónaí, is chéad rogha tosaíochta na gCoimisinéirí Ioncaim é dul i dteagmháil le gnóthaí chun socraíochtaí íocaíochta atá comhaontaithe go frithpháirteach a chomhaontú, in áit nósanna imeachta bailithe fiachais a fheidhmiú. Dá bhrí sin, molann na Coimisinéirí Ioncaim go láidir d'aon ghnó a fhaigheann éileamh sna laethanta amach romhainn gníomhú gan mhoill. Féadfaidh gnóthaí dul i dteagmháil leis na Coimisinéirí Ioncaim 24/7 trínár mbealaí ar líne (M’Fhiosruithe nó trí Sheirbhís ar Líne na gCoimisinéirí Ioncaim (ROS)) nó, mar mhalairt air sin, teagmháil a dhéanamh le Rannóg an Ard-Bhailitheora ar an teileafón ar 01 738 3663.
Tá na Coimisinéirí Ioncaim ar an eolas go ndearna roinnt gnóthaí teagmháil leis na Coimisinéirí Ioncaim le mí anuas ach nár thíolaic siad togra foirmeálta tráthíocaíochtaí sa deireadh. Má dhéanann siad amhlaidh roimh an gCéadaoin seo chugainn (15 Bealtaine) cuirfear téarmaí na scéime stórasaithe fiachais, lena n-áirítear an t-ús 0%, i bhfeidhm ar a bplean íocaíochta. Tá muid ag cur córais nuashonraithe i bhfeidhm faoi láthair chun na rátaí caighdeánacha úis a fheidhmiú ar aon fhiachas stórasaithe amuigh, agus cuirfear é seo i bhfeidhm go huathoibríoch ar an 15 Bealtaine sa chás nach bhfuil plean íocaíochta tugtha chun críche. Dá bhrí sin, tugann an tréimhse éilimh deis dheireanach do ghnóthaí teagmháil a dhéanamh leis na Coimisinéirí Ioncaim faoin gceist, agus leanfaidh na Coimisinéirí Ioncaim ag plé le tograí íocaíochta déanacha, a thíolactar le linn na tréimhse éilimh ábhartha.
Nuair a dhéanfar nuashonrú ar an gcóras, tosóidh na Coimisinéirí Ioncaim ag eisiúint fógraí éilimh deiridh don fhiachas atá fágtha. Cuirfidh an fógra éilimh deiridh foláireamh seacht lá in iúl sula ndéanfaidh na Coimisinéirí Ioncaim an gníomh forfheidhmiúcháin cuí.
[CRÍOCH 09/05/2024]