Earraí a cheannach ar líne le haghaidh úsáid phearsanta

Aisíocaíocht Dleachta Custam agus Cánach Breisluacha (CBL)

I gcúinsí áirithe, d'fhéadfadh sé a bheith indéanta aisíocaíocht a fháil ar dhleachtanna Custam a íocadh. Áirítear leis sin cásanna:

• gur cuireadh earraí a cheannaigh tú ar ais go dtí an díoltóir
• nó
• gur cuireadh faisnéis mhícheart isteach ar an dearbhú iompórtála amhail luach Custam mícheart nó ráta CBL mícheart.

Má cheapann tú go bhfuil tú i dteideal aisíocaíocht a fháil mar gheall ar earráid sa dearbhú iompórtála bunaidh, ba chóir duit teagmháil a dhéanamh leis an gcúiréir nó leis an oibreoir poist. Ní mór duit na doiciméid tacaíochta riachtanacha a chur ar fáil dóibh, amhail deimhniú ordaithe nó sonrasc, chun cur ar a gcumas an dearbhú a cheartú. 

Tabhair do d'aire

Ní fhéadtar aisíocaíocht a éileamh go dtí go mbeidh na muirir Custam íoctha.

Aisíocaíocht ar chánacha iompórtála a éileamh i leith earraí a chuirtear ar ais chuig an díoltóir

Ba chóir duit teagmháil a dhéanamh leis an díoltóir ar dtús chun d'aisíocaíocht a dheimhniú chomh maith leis na céimeanna a theastaíonn uait a ghlacadh. Áirítear leis seo an chaoi ar chóir na hearraí a chur ar ais.  Féadfaidh seirbhís ar leith a bheith ag an díoltóir a úsáideann siad chun earraí a chur ar ais.

Má d'íoc tú cánacha iompórtála leis an díoltóir ag an bpointe díolacháin, ba chóir duit aisíocaíocht a lorg ón díoltóir. Nuair a chuirtear na hearraí ar ais, socróidh an díoltóir aisíocaíocht ar na dleachtanna agus na cánacha a d'íoc tú leo.

Má d'íoc tú cánacha iompórtála le cúiréir nó le hoibreoir poist, ba chóir duit aisíocaíocht ar na cánacha iompórtála a lorg uathu siúd. Beidh cruthúnas ag teastáil uathu gur easpórtáladh na hearraí amach as an Aontas Eorpach (AE).

Ní fhéadtar aisíocaíochtaí ar earraí aisdúichithe a phróiseáil ach laistigh de 90 lá ón dáta ar iompórtáladh na hearraí isteach san AE.

An próiseas agus cruthúnas le haghaidh earraí a easpórtáiltear ar ais chuig an díoltóir

Ní mór dearbhú easpórtála Custam a chomhlánú le haghaidh earraí ar ais má bhí luach intreach €150 nó níos mó ar do choinsíneacht ar dtús. Tá feidhm aige seo fiú mura bhfuil ach mír amháin ón gcoinsíneacht á chur ar ais. 

I gcásanna áirithe, féadfaidh an díoltóir an dearbhú easpórtála Custam do na hearraí ar ais a chomhlánú ar do shon. Mura bhfuil, beidh ort socrú a dhéanamh le cúiréir nó oibreoir poist chun an dearbhú easpórtála a chomhlánú ar do shon. 

Sannfar Máistir-Uimhir Thagartha (MRN) don dearbhú easpórtála tráth easpórtála na n-earraí. Leithdháileann Custaim an tagairt seo ar gach dearbhú Custam. Ba chóir duit an MRN a iarraidh ón gcúiréir nó ón oibreoir poist a chomhlánaigh an dearbhú easpórtála thar do cheann. Ba chóir duit é seo a chur ar fáil ansin mar chruthúnas don díoltóir chun a dheimhniú gur comhlánaíodh an dearbhú easpórtála. 

Má cháiligh an choinsíneacht a iompórtáladh ar dtús le haghaidh Faoiseamh i leith Lastaí ar Luach Íseal, ní theastaíonn dearbhú easpórtála le haghaidh tuairisceán.  Mar sin féin, beidh ort cruthúnas easpórtála a bheith agat. Glactar le cóip den admháil phoist nó den deimhniú ó chúiréir na heaspórtála mar chruthúnas. Ní mór duit é seo a choinneáil, mar d'fhéadfadh an díoltóir é a lorg sula n-eisíonn siad an aisíocaíocht duit.

Tuilleadh eolais

Má tá tuilleadh eolais uait, déan teagmháil leis an Aonad Ríomhthráchtála