Faoiseamh i leith Céile nó Páirtnéir Sibhialta Mharthanaigh

Baineann an díolúine seo sa chás:

• ar dháta an bhronntanais nó na hoidhreachta, tá do pháirtnéir sibhialta nó céile éagtha
• go bhfaigheann tú bronntanas nó oidhreacht ó dhiúscróir a bhí gaolta le do chéile nó páirtnéir sibhialta
• agus
• nuair a fuair do chéile nó do pháirtnéir sibhialta bás, bhí gaol níos gaire acu leis an diúscróir ná mar a bhí agatsa.

Sa chás go mbaineann an faoiseamh, measfar go bhfuil an caidreamh céanna agat leis an diúscróir agus a bhí ag do chéile nó páirtnéir sibhialta.  Go bunúsach, téann tú in áit do chéile nó pháirtnéara shibhialta nach maireann chun críocha Cánach Fháltais Caipitiúil (CFC). 

Tá an Faoiseamh i leith Céile nó Páirtnéir Sibhialta Mharthanaigh éigeantach. Ciallaíonn sé so má tá do thairseach Ghrúpa A nó B úsáidte agat, níl tú in ann roghnú tairseach Ghrúpa C a thógáil.

Sampla 1

Tá Áine mar bhaintreach Mháirtín agus faigheann sí bronntanas ar luach €50,000 ó Mháire, máthair Mháirtín. Tá caidreamh níos láidre ag Máirtín agus Máire ná atá ag Áine agus Máire. Mar chéile marthanach Mháirtín, measfar go bhfuil an caidreamh céanna ag Áine agus Máire mar a bhí ag Mháirtín chun críocha CFC. Cuirfear an tairseach Ghrúpa A i bhfeidhm dá bhrí sin. 

Fuair Áine sochar in-chomhiomlánaithe ar luach €500,000 cheana féin óna athair in 2010. Ós rud é go raibh tairseach Ghrúpa A úsáidte ag Áine cheana féin, tá sé incháinithe go hiomlán ar an mbronntanas €50,000 a fuair sí ó Mháire, máthair Mháirtín. Ní fhéadann Áine roghnú go gcaithfear léi mar strainséir fola agus tairseach Ghrúpa C a thógáil.

Sampla 2

Is í Sorcha páirtnéir sibhialta marthanach Laoise agus faigheann sí teach ar luach €200,000 le hoidhreacht ó uncail Laoise, Gearóid. Tá caidreamh níos láidre ag Laoise agus Gearóid ná atá ag Sorcha agus Gearóid. Mar chéile marthanach Laoise, measfar go bhfuil an caidreamh céanna ag Sorcha agus Gearóid mar a bhí ag Laoise chun críocha CFC. Cuirfear an tairseach Ghrúpa B i bhfeidhm dá bhrí sin. 

Má bhí tairseach Ghrúpa B úsáidte ag Sorcha cheana féin, ní fhéadfadh sí an rogha a dhéanamh chun tairseach Grúpa C a thógáil.

Conas an faoiseamh a éileamh

Chun an Faoiseamh i leith Céile nó Páirtnéir Sibhialta Mharthanaigh a éileamh, ní mór duit Foirm Tuairisceáin CFC IT38 a thíolacadh ar líne. Ní mór duit an tuairisceán a thíolacadh trí moChúrsaí nó trí Sheirbhís ar Líne na gCoimisinéirí Ioncaim (ROS).