Cáin Mhaoine Áitiúil - céard is gá duit a dhéanamh le haghaidh 2025

Maoine a bhí faoi dhliteanas CMÁ in 2024

Íocaíocht

Má íocann tú CMÁ trí mhodh íocaíochta athfhilltí, tabharfar é seo ar aghaidh go dtí 2025 go huathoibríoch. I measc na modhanna íocaíochta athfhilltí tá:

• Dochar Díreach (míosúil nó bliantúil)
• asbhaint ag an bhfoinse ó:
  • do thuarastal, do phá nó do phinsean ceirde
  • d’íocaíochtaí ón Roinn Coimirce Sóisialaí (RCS)
  • d’íocaíocht ón Roinn Talmhaíochta, Bia agus Mara.

Tabhair do d’aire

Má íocann tú do CMÁ le Dochar Díreach nó Treoir Dochair Bhliantúil agus tá tú tar éis do sholáthraí bainc athrú le déanaí, ba chóir duit do shonraí bainc a thabhairt cothrom le dáta don CMÁ. Le haghaidh tuilleadh eolais, féach Do shonraí bainc le haghaidh CMÁ a thabhairt cothrom le dáta.

Má d’íoc tú do CMÁ trí mhodh íocaíochta neamh-athfhilltí, is gá duit socruithe a dhéanamh do CMÁ a íoc le haghaidh 2025. Is gá duit rochtain a fháil ar do thaifead maoine leis na Coimisinéirí Ioncaim agus an modh íocaíochta is oiriúnaí duit a roghnú le haghaidh 2025.

Is cuma cén chaoi ar íoc tú do CMÁ le haghaidh 2024, féadtar modh íocaíochta éagsúil a roghnú le haghaidh 2025. Le haghaidh tuilleadh eolais, féach Do mhuirear CMÁ a íoc.

Tuairisceán CMÁ

Má bhí do mhaoin ina maoin chónaithe ar an 1 Samhain 2023, bhí sí faoi dhliteanas na Cánach Maoine Áitiúla (CMÁ) in 2024. Ba chóir go mbeadh do Thuairisceán CMÁ tíolactha agat don tréimhse 2022 go 2025. Má tá an tuairisceán CMÁ seo tíolactha agat, ní gá duit tuairisceán nua a thíolacadh in 2025.

Tabhair do d'aire

Mura bhfuil do Thuairisceán CMÁ don tréimhse 2022 go 2025 tíolactha agat go fóill, ba chóir duit é sin a dhéanamh láithreach.

Luacháil do mhaoine

Tá do mhuirear CMÁ le haghaidh 2022 go dtí 2025 bunaithe ar do luacháil ar do mhaoin amhail an 1 Samhain 2021. Níl ort athbhreithniú a dhéanamh ar do luacháil fiú má tháinig méadú ar luach do mhaoine ó 1 Samhain 2021 i leith. Le haghaidh tuilleadh eolais, féach Do mhaoin a luacháil.

Díolúintí CMÁ

Má bhain tú leas as an díolúine CMÁ in 2024, tabharfar ar aghaidh é go dtí 2025. Mar sin féin, ba chóir duit a chinntiú go gcomhlíonann tú na coinníollacha cáilithe don díolúine ábhartha.

Iarchur CMÁ

Má d’éiligh tú iarchur CMÁ in 2024, tabharfar ar aghaidh é go dtí 2025. Ba chóir duit a chinntiú go leanann tú de bheith comhlíontach ó thaobh na critéir cháilitheachta le haghaidh iarchur CMÁ.